ഇന്ന് ലോക ശാസ്ത്രദിനം
എല്ലാ വര്‍ഷവും നവംബര്‍ 10 ന് ലോക ശാസ്ത്രദിനം ആചരിക്കുന്നു. ശാസ്ത്രത്തിന്റെ ഇതുവരെയുള്ള നേട്ടങ്ങളേയും ഇനിയും പിന്നിടാനുള്ള കടമ്പകളെയും കുറിച്ച് ഓര്‍മ്മിപ്പിക്കാന്‍ ഒരു ദിനം. ശാസ്ത്രവും സമൂഹവും തമ്മിലിള്ള അകല്‍ച്ച ഇല്ലാതാക്കുകയാണ് ഈ ദിനാചരണത്തിന്റെ മറ്റൊരു ലക്ഷ്യം.
2001 ല്‍ ആണ് ശാസ്ത്രദിനം ആചരിക്കാന്‍ യുനെസ്‌കോ തീരുമാനിച്ചത്. സമാധാനം നിലനിര്‍ത്താനും വികസനം നേടിയെടുക്കാനും ശാസ്ത്രത്തെ എത്രമാത്രം ഉപയോഗപ്പെടുത്താം എന്ന് ഓര്‍മ്മിപ്പിക്കുന്നതിനു വേണ്ടിയാണ് യുനെസ്‌കോ ഈ ദിനം ശാസ്ത്രദിനമായി ആചരിക്കുന്നത്. സമാധാനപൂര്‍ണ്ണവും ഐശ്വര്യപൂര്‍ണ്ണവും സമത്വപൂര്‍ണ്ണവുമായ ഒരു ലോകം കെട്ടിപ്പടുക്കാനും അന്തര്‍ദേശീയ സഹകരണവും ഒന്നിച്ചുള്ള കര്‍മ്മപദ്ധതികളും നടപ്പാക്കാനുമായി ശാസ്ത്രത്തെ ഉപയോഗപ്പെടുത്താന്‍ യുനെസ്‌കോ ഈ ദിനത്തില്‍ എല്ലാവരെയും ആഹ്വനം ചെയ്യുന്നു.
സയന്‍സ് എന്ന ഇംഗ്ലീഷ് ഭാഷയുടെ തര്‍ജ്ജമയായി മലയാളത്തിലുപയോഗിക്കുന്ന പദമാണ് ശാസ്ത്രം. സയന്‍സ് എന്ന വാക്ക് ലാറ്റിന്‍ ഭാഷയിലെ സയന്റിയ എന്ന പദത്തില്‍ നിന്നാണ് നിഷ്പന്നമായിട്ടുള്ളത്. ‘അറിവ്’ എന്നാണ് ഇതിന്റെ അര്‍ത്ഥം. പ്രപഞ്ചത്തെപ്പറ്റിയുള്ള അറിവ് സ്വരുക്കൂട്ടുകയും പരീക്ഷിച്ചുനോക്കാവുന്ന വിശദീകരണങ്ങളായും പ്രവചനങ്ങളായും ക്രമീകരിക്കുകയും ചെയ്യുന്ന ഒരു പ്രസ്ഥാനമാണ് ശാസ്ത്രം.
ഇന്ത്യയില്‍ ഫെബ്രുവരി 28 ദേശീയ ശാസ്ത്ര ദിനം ആയി ആഘോഷിക്കപ്പെടുന്നു. 1928 ഫെബ്രുവരി 28 നാണ് സര്‍ സി. വി. രാമന്‍ , നോബല്‍ പുരസ്‌കാരം നേടിയ രാമന്‍ പ്രതിഭാസം (രാമന്‍ എഫെക്റ്റ്) കണ്ടെത്തിയത്. ആ ദിനത്തിന്റെ ഓര്‍മ്മക്കായാണ് ഇന്ത്യയില്‍ ദേശീയ ശാസ്ത്ര ദിനം ആചരിക്കുന്നത്.
