100 പേരുടെ മണാലി യാത്രയുടെ ചെലവ് വഹിച്ച് വിജയ് ദേവെരകൊണ്ട
ആരാധകർക്കായി സിനിമ താരം വിജയ് ദേവെരകൊണ്ട നല്‍കിയ ഒരു സമ്മാനത്തിന്റെ വാര്‍ത്തയാണ് ഇപ്പോൾ പുറത്തുവരുന്നത്. നൂറ് ആരാധകരുടെ മണാലി യാത്ര സ്‍പോണ്‍സര്‍ ചെയ്‍താണ് താരം ഇപ്പോള്‍ ശ്രദ്ധയാകര്‍ഷിച്ചിരിക്കുന്നത്. വിമാനത്തില്‍ യാത്ര ചെയ്യുന്ന ആരാധകരുടെ വീഡിയോ തനിക്ക് അയച്ചുകിട്ടിയത് വിജയ് ദേവെരകൊണ്ട തന്നെ സാമൂഹ്യ മാധ്യമത്തില്‍ പങ്കുവെച്ചിട്ടുണ്ട്. മുമ്പ് തെരഞ്ഞെടുത്ത 50 ആരാധകര്‍ക്ക് താരം പ്രത്യേക ഉപഹാരം സമ്മാനിച്ചിരുന്നു. 100 ആരാധകര്‍ക്ക് 10000 രൂപ താരം ക്രിസ്‍മസ് സമ്മാനമായും ഒരിക്കല്‍ നല്‍കിയിട്ടുണ്ട്.
വിജയ് ദേവെരകൊണ്ടയുടേതായി ഇനി പ്രദര്‍ശനത്തിനെത്താനുള്ള ചിത്രം ശിവ നിര്‍വാണ സംവിധാനം നിർവഹിച്ച ‘ഖുഷി’യാണ്. സാമന്തയാണ് നായികയായി ചിത്രത്തില്‍ എത്തുന്നത്. ജയറാമും വിജയ് ദേവെരകൊണ്ടയുടെ ചിത്രത്തില്‍ പ്രധാന കഥാപാത്രമായി എത്തുമ്പോള്‍ സച്ചിൻ ഖെഡേക്കര്‍, മുരളി ശര്‍മ, വെണ്ണെല കിഷോര്‍, രാഹുല്‍ രാമകൃഷ്‍ണ, ശ്രീകാന്ത് അയ്യങ്കാര്‍ തുടങ്ങിയവരും വേഷമിടുന്നു.
