യുപിയിൽ വീണ്ടും ഏറ്റുമുട്ടൽ; ഗുണ്ടാനേതാവിനെ വെടിവെച്ചു കൊന്നു

ഉത്തർപ്രദേശിൽ വീണ്ടും ഏറ്റുമുട്ടൽ. ഗുണ്ടാനേതാവ് അനിൽ ദുജാനയെ ഉത്തർപ്രദേശ് പൊലീസിലെ പ്രത്യേക ദൗത്യസംഘം വെടിവെച്ചു കൊന്നു. നോയിഡ, ഗാസിയാബാദ് അടക്കമുള്ള പ്രദേശങ്ങളിൽ ജനങ്ങളുടെ പേടിസ്വപ്‌നമായിരുന്നു അനിൽ ദുജാനയെന്ന് ഉത്തർപ്രദേശ് പൊലീസ് പറയുന്നു.

മീററ്റിലായിരുന്നു സംഭവം. കൊലപാതക കേസിൽ ഒരാഴ്ച മുൻപാണ് ജാമ്യം കിട്ടി ദുജാന ജയിലിൽ നിന്ന് പുറത്തിറങ്ങിയത്. ഇതിന് പിന്നാലെ കൊലപാതക കേസിലെ മുഖ്യ സാക്ഷിയെ ദുജാന ഭീഷണിപ്പെടുത്താൻ തുടങ്ങിയതായി ഉത്തർപ്രദേശ് പൊലീസ് പറയുന്നു.സാക്ഷിയെ കൊലപ്പെടുത്താൻ പദ്ധതിയിട്ടതായി അറിഞ്ഞ് ദുജാനയെ അറസ്റ്റ് ചെയ്യാൻ തീരുമാനിച്ചു. ദുജാനയെ പിടികൂടാൻ പോകുമ്പോഴാണ് ഏറ്റുമുട്ടൽ നടന്നതെന്നും ഉത്തർപ്രദേശ് പൊലീസ് പറഞ്ഞു.