വനിതാ ടി20 ലോകകപ്പ് ; ഇന്ത്യ ഇന്ന് പാകിസ്ഥാനെതിരെ
ട്വന്റി 20 വനിതാ ലോകപ്പില്‍ ഇന്ന് ഇന്ത്യ- പാകിസ്ഥാന്‍ പോരാട്ടം. കേപ് ടൗണില്‍ വൈകിട്ട് ആറരയ്ക്കാണ് കളി തുടങ്ങുക. പരിക്കേറ്റ ഓപ്പണര്‍ സ്മൃതി മന്ഥാന ഇല്ലാതെയാണ് ഇന്ത്യ പാകിസ്ഥാനെ നേരിടുക. ക്യാപ്റ്റന്‍ ഹര്‍മന്‍പ്രീത് കൗര്‍ പരിക്ക് മാറിയെത്തിയത് ഇന്ത്യക്ക് ആശ്വാസമാണ്. കൈവിരലിന് പരിക്കേറ്റതിനെ തുടര്‍ന്നാണ് മന്ഥാനയ്ക്ക് മത്സരം നഷ്ടമാവുക. ഓസ്ട്രേലിയക്കെതിരായ സന്നാഹമത്സരത്തിലാണ് സ്മൃതിക്ക് പരിക്കേറ്റത്. പരിക്കിനെ തുടര്‍ന്ന് ബംഗ്ലാദേശിനെതിരായ സന്നാഹമത്സരത്തില്‍ ഇന്ത്യന്‍ വൈസ് ക്യാപ്റ്റന്‍ കളിച്ചിരുന്നില്ല.
കഴിഞ്ഞ തവണ ഫൈനലില്‍ തോറ്റ ഇന്ത്യ ആദ്യ കിരീടം ലക്ഷ്യമിട്ടാണ് പാകിസ്ഥാനെതിരെ ഇറങ്ങുന്നത്. വനിതാ ടി20 ലോകകപ്പുകളില്‍ ആറ് തവണ ഇരുവരും നേര്‍ക്കുനേര്‍ വന്നു. ഇതില്‍ നാലിലും ഇന്ത്യയാണ് ജയിച്ചത്. ഒന്നാകെ ഇരുടീമും 13 മത്സരങ്ങളില്‍ ഏറ്റുമുട്ടി. ഇന്ത്യ പത്തിലും പാകിസ്ഥാന്‍ മൂന്നിലും ജയിച്ചു. സ്റ്റാര്‍ സ്‌പോര്‍ട്‌സ് നെറ്റ്‌വര്‍ക്കില്‍ മത്സരം കാണാം. ഡിസ്‌നി ഹോട്‌സ്റ്റാറിലും ലൈവ് സ്ട്രീമിംഗ് ഉണ്ട്.
