വനിതാ ഐപിഎല്‍: ഫീല്‍ഡിംഗ് പരിശീലകനായി ബിജു ജോര്‍ജ്
വനിതാ ഐപിഎല്ലില്‍ ഡല്‍ഹി ക്യാപിറ്റല്‍സിന്‍റെ ഫീല്‍ഡിംഗ് പരിശീലകനായി മലയാളി പരിശീലകന്‍ ബിജു ജോര്‍ജ്. സഞ്ജു സാംസണിന്‍റെ പരിശീലകനായിരുന്ന ബിജു ജോര്‍ജ് 2017 ഏകദിന ലോകകപ്പില്‍ ഇന്ത്യന്‍ വനിതായ ടീമിന്‍റെയും ഫീല്‍ഡിംഗ് പരിശീലകനായിരുന്നു. ഐപിഎല്ലില്‍ ഡല്‍ഹി ക്യാപിറ്റല്‍സ് ടീമിന്‍റെ ഫീല്‍ഡിംഗ് പരിശീലകനായും ബിജു ജോര്‍ജ് പ്രവര്‍ത്തിച്ചിട്ടുണ്ട്.
ജൊനാഥന്‍ ബാറ്റിയാണ് ഡല്‍ഹി ക്യാപിറ്റല്‍സിന്‍റെ മുഖ്യ പരിശീലകന്‍. ഇംഗ്ലണ്ടിലെ ഹണ്ട്രഡ് ടൂര്‍ണമെന്‍റില്‍ ഓവല്‍ ഇന്‍വിസിബിള്‍സിനെ 2021ലും 2022ലും കിരീടത്തിലേക്ക് നയിച്ചത് ബാറ്റിയായിരുന്നു. മുന്‍ ഇന്ത്യന്‍ താരം ഹേമലത കലയാണ് ടീമിന്‍റെ സഹപരിശീലക. ഇന്ത്യക്കായി ഏഴ് ടെസ്റ്റിലും 78 ഏകദിനങ്ങളിലും കളിച്ചിട്ടുള്ള താരമാണ് ഹേമലത. ഇന്ത്യന്‍ വനിതാ ടീമിന്‍റെ ചീഫ് സെലക്ടറായിരുന്നിട്ടുള്ള ഹേമലതയുടെ നേതൃത്വത്തിലാണ് 2017ലെ ഏകദിന ലോകകപ്പ് ഫൈനലില്‍ എത്തിയ ഇന്ത്യന്‍ ടീമിനെ തെരഞ്ഞെടുത്തത്.
