കേരള ബ്ലാസ്റ്റേഴ്സ് ദുബൈയിൽ
യു.എ.ഇ മലയാളി ഫുട്ബാൾ പ്രേമികളെ ആവേശം കൊള്ളിക്കാൻ ഇഷ്ട താരങ്ങളുമായി കേരള ബ്ലാസ്റ്റേഴ്സ് ടീം സെപ്റ്റംബർ അഞ്ചിന് ദുബൈയിലെത്തും. ഇന്ത്യൻ സൂപ്പർ ലീഗ് സീസണിന് മുന്നോടിയായുള്ള പരിശീലന മത്സരങ്ങൾക്കായാണ് ടീം പ്രവാസി മണ്ണിലേക്കെത്തുന്നത്.
സെപ്റ്റംബർ അഞ്ചു മുതൽ 16 വരെ 11 ദിവസത്തെ പരിശീലനമാണ് ദുബൈയിൽ നടത്തുക. ഇതിനിടയിൽ യു.എ.ഇ പ്രമുഖ പ്രോലീഗ് ക്ലബ്ബുകളുമായി ടീം സന്നാഹ മത്സരവും നടത്തും. സെപ്റ്റംബർ ഒമ്പതിന് സബീൽ സ്റ്റേഡിയത്തിൽ വെച്ച് അൽ വസൽ എഫ്.സിയുമായാണ് ടീമിന്‍റെ ആദ്യ സൗഹൃദ മത്സരം. ഷാർജ ഫുട്ബാൾ സ്റ്റേഡിയത്തിൽ സെപ്റ്റംബർ 12ന് ഷാർജ ഫുട്ബാൾ ക്ലബുമായാണ് രണ്ടാമത്തെ മത്സരം നിശ്ചയിച്ചിരിക്കുന്നത്. പരിശീലനത്തിന്‍റെ അവസാന ദിനമായ സെപ്റ്റംബർ 15ന് മുൻ പ്രോ ലീഗ് ചാമ്പ്യൻമാരായ ശബാബ് അൽ അഹിലുമായി ടീം മത്സരിക്കും. ദുബൈയിലെ അൽ അവീറിലുള്ള ശബാബ് അൽ അഹിൽ സ്റ്റേഡിയത്തിലാണ് മത്സരം.
