’19(1)(എ)’ മോസ്കോ ചലച്ചിത്രോത്സവത്തിലേക്ക്

നവാഗത സംവിധായിക ഇന്ദു വി എസ് സംവിധാനം ചെയ്‍ത ’19(1)(എ)’ നാല്‍പത്തിയഞ്ചാം മോസ്കോ അന്താരാഷ്ട്രാ ചലച്ചിത്രോത്സവത്തിന്റെ മത്സരേതര വിഭാഗത്തിലേക്ക് തെരഞ്ഞെടുക്കപ്പെട്ടു. ഇന്ദു തന്നെ തിരക്കഥ എഴുതിയ ചിത്രം ആന്റോ ജോസഫ് ഫിലിം കമ്പനിയാണ് നിർമ്മിച്ചത്. ജനപ്രിയ നായകൻ വിജയ് സേതുപതിയും നിത്യാ മേനനുമാണ് ഈ ചിത്രത്തിൽ പ്രധാന വേഷങ്ങളില്‍ അഭിനയിച്ചിരിക്കുന്നത്. സാമൂഹ്യ-രാഷ്ട്രീയ പ്രസക്തമായ പ്രമേയം സ്ത്രീപക്ഷ കോണിലൂടെ തീവ്രമായും തന്മയത്വത്തോടെയും ആവിഷ്‍കരിച്ച 19(1)(എ) എന്ന ചിത്രം ഇക്കഴിഞ്ഞ ഐഎഫ്എഫ്‍കെയിൽ ഫിപ്രെസ്ക്കി പുരസ്‌കാരം നേടിയിരുന്നു. കേരളത്തിലെ ചെറുതും വലുതുമായ നിരവധി ചലച്ചിത്ര മേളകളിൽ ചിത്രം പ്രദർശിപ്പിക്കുകയും ചെയ്‍തിരുന്നു.

2020 ലാണ് 19 (1) (a) ചിത്രീകരിക്കുന്നത്. 2022 ജൂലൈയിൽ ഡിസ്‍നി ഹോട്സ്റ്റാറിലൂടെ പ്രേക്ഷകരിലേക്ക് എത്തിയ ചിത്രത്തിന് ഇന്ത്യയിലെ പ്രമുഖ ചലച്ചിത്ര നിരൂപകരുടെ പ്രശംസ ലഭിച്ചിരുന്നു. ഈ മാസം 20 മുതൽ 27 വരെയാണ് മോസ്കോ ചലച്ചിത്രോത്സവം നടക്കുക.